Dawr, sikul, Kohhran leh sorkar ang pawhin database software hmanga kan data te him leh tha taka enkawl hi a pawimawh hle a. Data hi a tlem lam aiin a lung lamin a thang zel a. Data tam tak ho lam taka enkawl hian buaina a tam duh hle a ni. Tunlaiah chuan spreadsheet (excel) hi data enkawl nen mi tinin kan hmang nasa hle a. Excel hian data hi file pakhatah a store a. data design, data model leh data view hi hmun khatah a dahkhawm vek mai a. Hei hi a that lohna ber niin an sawi thin a. Maherawh chu software hmasawn dan leh data pawimawhna hre em em lem lo te, excel bak hman thiam nei lem lo te hian Database aia tha niin an sawi thin thung a. Security leh Data integrity ngai pawimawh thiam chin te chuan data visualization nan te leh final data print nan te, quick calculation leh analysis atan te excel hi an hmang tangkai em em thung a ni.
Tunlai Technology hmanga vawn that theih eng pawh, zirchian leh endika tana hman theih bawk te hi data tiin kan sawi mai thin.
Database pawimawhna kan sawi ni khua hian excel kan sawi ziah a ngaihna chhan ber chu database ang maia hmang thin hi a tam zawk kan nih vang a ni ber. Hetihrual hian thiam taka hmang thiam erawh kan tam lo hle thung. A chhan pawh mithiam tak aiin a khawih thei ve ngawr ngawr tlawm zawka chhawr kan duh vang te pawh a ni ang. Duh duha khawih danglam a awlsam bik vang hi chu a ni em lovang chu maw....
Data enkawl nana thil tul tak te chu:
- Data te inlaichin (integrity) dan kha a buai em tih hi a ni a. E.g. Bazarah ka kal a nih chuan 'Ka kal thu chuang chung reng siin Bazar kha a bo daih chuan integrity a awm lo' tihna a ni mai.
- Data security a tha tawk hle tur a ni a. Duh duhapaih theih te, thlak danglam theih te hi thil tha tak mah ni se, a titu tur dik takin a ti em tih lai hi a pawimawh hle a. E.g. Mi harsa pakhat Kohhranin Rs 1000-in a lo tanpui a. Excel sheet-ah uluk takin ziah luh a ni a. A hnu-ah naupang ninhleiin a lo delete leh daih chuan emaw a enkawltu phalna la lova lo paih a nih chuan report a nghawng nghal der a. Dik lo a awm tihna a ni. Excel i hman chuan history chhui a buaithlak tawh thin.
- Audit tlak a ni tur a ni. Data dah thar, paih leh thlak danglam te reng reng hi kan paih/add/edit ni leh thla, a user nen thlapa record awm hi a pawimawh hle a. Database chuan automatic-a serial siam theihna a nei a. Hei hian kan data te kha unique tak vekin a dah thei a. Data kan paih khan a serial kha a paih tel ve lo va. Data integrity check nan te, serial bo check nan te a tha hle a ni.
- Mihring rinawmna: Mihring rinawm tak pawhin hmanruaa neih that loh chuan data thilah chuan tihsual tam tak an nei thei ve a. Mi rinawm lo lakah ngat phei chuan data tih chingpen hi hmanrua tha vak lo hman phei chuan a tam thei viau ang. Chuvangin mihring rinawm lo tan pawha rinawm ngei ngei tul turin data enkawlna tha, rinawm ngei ngei ngaihna neih a pawimawh hle a ni. Mi rinawm ni ngeia lang pawh khan tihsual a neih chuan mi rinawm lo a ni thei tlat.
- Inenfiah nan data hi a pawimawh hle a. Hma kan sawn em tih te. Kan hnufumna lai en nan te. Fur leh thal, sik leh sa danglam ang zela kan data danglamna hriat nan te. Dawr kai kan nih chuan kan item hralh tlem hun leh tam hun hriat nan te, Kohhran lam a nih pawhin thawhlawm luh tam hun, luh tlem lai hriat nan te. Kan tih thatna leh tihchhiatna dik taka kan hriat hian hmalam kan pan zel na tur kawng thui takin min kawhhmuh tel tih hriat a tha awm e.
Point hrang hrang te kan thlir hian excel chu data enkawl nan chuan a fail chiang hle tih kan hmu thei mai awm e. Chutihrualin Data pawimawh ber ber enkawltute chuan kan la hmang der si lo. Point kan tarlan te hi mi nawlpui tana hriat nuam tawk tura ka ngaih chin chiah a ni a. Chhiar ninah te a kal theih avangin technical lam deuh te chu kan tarlang ta lo a ni.
Database hman hi a tha hle a, chutihrualin database software ni lo (E.g. Excel te ang) leh database software rintlak loh (E.g MS Access te) hman erawh a pawi thui thei viau a. Pawl leh kohhran, sikul tan Software kan lei ve dawn a nih chuan kum hnih khat mai ni lo, kum tam tak daih tur lei a tha a. Experienced lo siam aiin experience siam a tha bik zel bawk a. Tunlaiah chuan Database software pawh online-a hman chi leh Offline-a hman chi te thlengin a awm a. Online-a hman chi te hi a tlawm tlangpui a. Mahse lei nghal tawp ang chi a ni ve lo va, subcribe ngai (thlatin pawisa chawia hman hawh) chi a ni. Kan sum lakluh milin online database te pawh hi hman a that zawkna tam tak a awm ve thei a. Chutihrualin Offline-a hman chi te pawh tunlaiah chuan kum tin hman man chawi ngaiin a then chuan an siam tawh bawk a ni.