THUHMA
Internet khawvelah kan awm ve a ni tih lantirna tha ber chu internet khawvela hming neih ve hi a ni. Mihring hming nena a danglamna chu kan thiltih leh thawh azirin kan hminga tel ngei ngei tur hminga bet tel hnam hming ang deuh kan neihtel vek a ngai a, chutiang chu a sapṭawng chuan top-level domain tiin an sawi mai thin a. Sumdawnna lam khawih te chuan .com (dot com) an hmang tlang pui a, entirnân amazon.com te hi a hming chu amazon a ni a, a hnam hming ang reng deuh chu .com a ni. Non-profit organisation te chuan .org (dot org) an hmang a. Tin a ram ang zawng pawhin top-level domain hi a awm a, entirnan USA-a chengte chuan .us tih an hmang a, India rama mi te chuan .in kan hmang a. Australia lam te chuan .au, adt. Zirna in lama hman atan .edu, .ac, .res a awm a. Hun a kal zela Internet pianna hmunpui US lam khuan .edu leh .ac top-level domain te hi anmahni ram chhunga accreditted institute te chauh hman theih turin an hauh (reserved) a. Chuvangin India ram aṭang chuan hman ve kan duh a nih pawhin .edu.in tiin thui deuh hlekin kan ram domain .in telin kan hman a lo ṭul ta a ni. (He thuziak hi internet techie te tana ziak a nih loh avangin engkim hi hriatnuam turin ka thlep kual vel a ni. Technically chuan valid loh deuhna mi naran tana hriat nuam deuh tur ni siin kan ziak a ni ber.)
INTERNET KHAWVELA INLUAH
A chunga kan tarlan ang hian Domain eng pawh leiin Internetah hming kan lo nei thei a. Mahse hming ringawt neiin Internetah kan awm ringawt a, chenna in erawh kan la nei lo. Internetah hian chenna in luah hawh tur hi a maka maka tam, man tlawm leh to deuh pawh a tam em em mai a. Chenna in kan neih chiah khan kan hming hi kan veng leh address chu a lo dawn ta a ni. Website te kan dah thei a, email leh thil dang dang software dah leh install nan kan hmang thei dawn bawk a ni. Heta chenna in luah hawh theih te hi Server (Rawngbawltu tihna lam a ni lo. Computer chak bik interneta website te phochhuaktu tihna) tiin an sawi a. Kan luah hawh khan thil tam tak min tihsak tel a, internetah min phochhuak a, chu chu Hosting tiin an sawi leh a ni. Email service lam dah nan bika siam te chu Email Hosting tiin an sawi leh a ni.
Mi tu emaw in ‘website ka nei’ a tih chuan Internet-ah server thlatin man chawiin a hawh tihna a ni. Luah man hi a thla bi kher lovin prepaid-in kum 1/2/3 leh a aia tam pawh an pe lawk thei a, hei hi tihdan tlangpui pawh a ni.
Kan sawi tawh ang khan In luah tur chi hrang hrang a awm a. A lar zual deuh te chu: Shared Server, VPS Server, Dedicated Server te an ni a. Shared server kan luah hawh chuan Building lianpuia apartment pakhat luah ang vel kan ni a, VPS ah chuan floor khat luah ang vel kan ni leh a, dedicated server ah thung chuan In pakhat luah ang kan ni thung. Chuvangin Dedidcated Server luah man hi a to bik hle bawk a ni. Heng server luah hawh theih zawng zawngah hian hmanrua chi hrang hrang an dahsa tlangpui a. A changkang leh deuhah chuan heng server kan luahhawh theih te hi server pakhat chauh ni si khan hmun hrang hrangah a leitu hnaih deuhah te a khawl hi an hung a. Khawl pakhat a chhiat pawhin hmun hla zawka mi khawl hmanga chawm theih turin kan server an thlunzawm vek a. Khawl lianpui pakhatah server tam tak software hmangin an remkhawm a, pakhat a that loh pawhin pakhatin a chhawk thei a, chutiang chu cloud server tiin hming pawh an phuahhran nghe nghe a ni. VPS/Dedicated Server kan lei chuan mahni duh danin kan server luah chu a chhungah room kan siam belh leh zel thei a ni.
Kan thupui lamah lo let leh tawh ila. A tir lama kan tarlan zeuh tawh ang khian top-level domain .edu hi US tih loh ram dang tan neih a rem ve tawh lo va. Chuvangin accreditted institution te hman tura hauh bik .edu.in hi India ram institution te chuan kan hmang ve thei a ni. He domain hi sorkarin mi na zawng neih a remti lo va, nei tur chuan sorkar approved/affiliated institute nih a ngai a ni.
Khawvel puma hman theih .edu.in, .ac.in, .res.in domain pe chhuak theitu India sorkar chuan Ministry of Electronics & IT, Government of India hnuaiah Scientific Society, the National Research & Education Network a din a ni. Anni hian a khat tawkin domain hawh man leh registration kalphung leh document ngai te an siamtha ve reng a ni. Domain kan sawite pechhuak theitu awm chhin an ni bawk.
Educational Domain neih pawimawhna leh ṭangkaina
.edu.in domain ṭangkaina leh ṭhatna zawng zawng ziah sen rual loh ziah tur a awm ngei ang. Mahse chhiar ninawm lo thei ang ber turin a point te te-in tarlan kan tum nge.
1. Search Engine: Internet (Google)-ah nitin zirlai, researcher, mi naran, vantlang leh u Vanchheuva te chenin smartphone hmangin chhiar tur, ngaihthlak tur, thlir tur kan zawng ṭhin a. Search Engine siamtu (Google te ang) lam hian internet-a site hrang hrang thuziak, video, thlalak (content) te uluk taka thlifim(filter)-in kan thilzawn (search result) min chhawpchhuahsak a. Chutianga content a zawnna lamah chuan site ṭhenkhat .edu domain te hi zirna in lian leh research institute te chauh hman theih a nih bawk avangin an content te ṭha bik leh rintlak bik tehnaah a buk a tirit bik hle a. Tin zawn zin bik a nih phei chuan Search ranking (miin an zawn apianga lang hmasa bik)-ah a chhawpchhuak sang bik hle ṭhin bawk a ni. Chumi awmzia chu Internet khawvelah tlar hma lam kan hnaih bik theihna a ni tihna a nih chu. Edu domain hmanga website address kan neih chuan kan zirlaite’n ruahthamloh article ṭha tak tak ziak se, internet khawvel chhiar a hlawh bik thei dawn tihna a ni tel bawk. Govt. of India verified domains zing-ah kan tel ve miau a.
2. Educational Email: .edu.in domain kan neih chuan educational email kan hosting a zirin duh zat zat kan nei thei dawn tihna a ni. .edu email hi vai ho chuan inlak lu len nân an hmang hle. A hnuai lama point hrang hrang kan tarlan te hi edu email hmanga kan neih (avail) theih te an ni.
3. DropBox space: Drop Box-ah chuan email(e.g. gmail) satliaha kan in register chuan 2GB space a free-in kan nei thei a. .edu.in email kan hman chuan 4GB kan nei thei ang. Referal kan hman tel phei chuan 8GB thleng free space kan nei thei.
4. Discount on Microsoft Products: Microsoft hian product leh service chi hrang 101 lai an nei a. .edu.in email nei chin chuan discount price-in kan lei thei a ni. A then phei chu a free leh nghalin.
5. Office 365: Office 365 Education hi Microsoft office suite version thar ber a ni a. Word, Excel, Powerpoint, OneNote, Microsoft Team (Zoom ang deuh) leh classroom tools te man chawi lo (free) in edu email kan neih chuan kan hmang thei.
6. Github: Software Developer ni ve lem lo tan chuan a ṭangkai em em lo va. Mah erawh chu unlimited space a neih avangin thuziak or digital data vawn ṭhat nân a ṭha em em a, Public vek a ni thung a. Private account nei tur chuan subcription lei a ngai ve a. .edu email kan neih chuan private account panga vel a neih theih a ni. Github hi software developer te chuan software versioning enkawl nân leh project khawih nana an hman lian ber a ni a. Microsoft company ta a ni.
7. Content reliability: .edu domain content reng reng chu khawvel huapa rintlak leh thu lakchhawnna tlaka ngaih a ni.
8. Not for everyone: edu domain hi mi zawng zawng neih theih a nih ngawt lo. Accredited institutions te chauh neih theih a ni bawk.
9. Autodesk: A man zat chhiar inthlahrunawm khawpa man to leh ṭha Architect software ropui hi edu mail nei te chuan a thlawnin an hmang thei tlat mai. Well Done, Autodesk.
10. Adobe Creative Cloud for Education: Khawvel huapa educational software leh product dang hrim hrim pawh a quality ber ber siamchhuaktu, Mizo te pawhina kan hman addict em em, pagemaker te, photoshop te siamtu an ni a, products chi hrang 56 lai neiin edu mail nei te tan chuan 60% discount-in kan lei thei bik dawn a ni.
11. JetBrains: Khawvela developer te thian tha ber chu software code-na IDE leh package tools te hi an ni a, chutiang siamtu ṭha lawr bik zinga mi an ni. Academic Licensing hran neiin zirlai leh zirtirtu edu email neitu tan chuan a thlawn vekin an product hi a hman theih a ni.
12. Microsoft Azure: chibai Microsoft ti leh phawt teh ang. He platform hian zirlai leh zirtirtu, institution tan product chi hrang 200 lai mai a chhawpchhuak rup mai a. edu email nei tan a thlawnin resources tam tak hman tur storage/product, etc. a awm a. Chumai chu an la duh tawk lo a ni ang $100 tluka hlu credit an dahtel bakah Microsoft-ah internship opportunity an la siamsak zui.
13. Designing lam tui tan: Design tui tan Canva Pro hi hman nuam leh tha em em a ni a. Designa hman tur image, icons, fonts leh template chhiarsenloh tlawhmukruh zet a nei a. 100GB cloud storage a keng tel bawk a. GitHub Student developer nen linkin a thlawnin a hman theih.
14. LucidChart: a free version kan lo khalh ve zeuh tawh Charting tool bawnra lutuk pawh hi a free-in edu email hmangin kan hmang thei.
15. Amazon Prime: Sumsen ngai lo va Amazon Prime thlaruk chhung hman theihna email chu edu email hi a ni e.
16. Evernote premium: Tinreng bu an tih mai thin hi 50% discount-in edu email hmang a lei ve theih.
17. Squarespace: website, blog, portfolio site neih ve hrim hrim duh dan 50% discount-in edu mail hmangin hetah hian a neih theih. wiz.com ah pawh hetiang offer hi a awm ve bawk.
18. Spotify: he streaming service hi kei chuan eng teh ualah kan ngai hran lo va, mahse a tuipui te chuan an addict ve thei viau mai a. edu mail hmangin 50% discount-in a lei ve theih.
19. Youtube Premium: Kumin hian kan hriat angin youtube chuan premium version hi an launch a. edu mail hmangin discount-in a lei theih. Ads awm lova han stream pur pur theih chu chakawm ve fu.
20. Ableton: Music lamn software siam te chuan edu mail tan 40% lawih an discount ve thei. Ngaihnep ngawt chi a ni lo. A product hi music tui te tan chuan turu rem rem tak a ni.
21. Lenovo: Smartphones leh laptop discount-in a lei theih a. EMI interest awm lovin edu mail nei tan a lak theih bawk.
22. HP: HP pawhin printers, accessories leh monitor bikah edu mail nei tan 50% discount an pe ve tlat mai.
23. Samsung: Samsung product zawng zawng 10% discount a awm vek a. Smartphones, laptops, tablets leh accessories dangah 40% discount-in edu mail nei te chuan kan lei thei.
24. Google Workspace for Education Fundamentals (G-Suite for education) hi edu domain nei te chuan a free-in kan hmang thei a ni. A feature tlangpui chu Docs, Slides, Sheets, Drive, Forms, jamboard, Classroom, Assignments, Gmail, meet, chat, keep, calendar, task, etc. Hengte hi a mal te te pawhin an chanchin ziah tham veka pui an ni.
25. MindSumo: Thluak tha te tual lenna an tih mai. Idea sharena hmunpui hi tun hma chuan man chawi a ngai ve a. Edu domain nei te chuan a thlawnin an hmang a. Tunah chuan a free ta vek law law...hehe
26. Riptiger: Eng site atang pawhin video download theihna a ni a, edu mail hmangin a thlawnin kan nei thei.
27. RoboForm Everywhere: Password hi tunlai khawvelah chuan kan ngah chho mawlh mawlh hlawm hle mai a, a enkawlna lam te hi neih that a pawimawh hle a. Edu mail nei te chuan he online tool hi a rthlawnin kumkhat chhung kan hmang thei.
28. Grammarly Education: English-a thuziah tuite tan thian tha ber mai hi a thlawnin edu domain hmangin neih theih a ni.
29. Unlimited Google drive Space: he thil zet hi chu a awhawm kher mai. edu mail nei te chuan unlimited space kan nei dawn tihna. Kan hriat theuh angin a free chin chu 15GB a ni a. Kum 2014 atang daih tawhin he thil hi an kalpui tawh a ni.
30. Zoom Premium: Zoom 40 Minutes limitation hi edu mail hmanga kan in register chuan unlimited time a ni thung ang.
31. Apple: Apple company pawhin edu email nei zirlaite tan discount an nei bawk.
32. Dell: Dell pawhin nasa takin discount an pe bawk a ni.
33. Acer: Acer company pawhin discount range hrang hrang an nei bawk.
34. Malab: mathematics lam tuite thian matlab te hi kum khat hman man pawh India pawisa chuan nuai chuang fe a ni a. Indian Rupee 3000 vel bawr chauh chawiin a hman theih a ni.
35. Yenka: Maths, ICT leh Science Lab software tha chungchuang tak siamchhuaktu an ni a, zirlai leh zirtirtu tan an product hi a thlawnin a hman theih a ni.
36. Pixlr: Educators leh student te tan a free.
37. Jotform: Research & survey tihna hmanraw ṭha tak hi kum khat tan edu mail zarah educator leh student te’n a thlawnin an hmang thei.
Kan sawi seng tak tak dawn lo. Khawvela company lian zawng zawng deuh thaw hian Zirlai (student) leh zirtirtu (educator) te hi min duat em em mai a, zirna lam (Education & Research) tan an thil siam product/services eng emaw tal/chin hi an hlan (sacrifice) ve a. Kan lo chhawrbawk ve theihna hmanraw pawimawh tak chu edu domain neih hi a ni. Institution ṭha tehnaah pawh credit ngah tak a ni tel a. Heti khawpa pawimawh ta chu dan phal loh ni mahse a ruka edu mail hralh chhawng pawh internet khawvelah hian an awm ve nual a. Entirnan freelance project fiverr.com-ah te pawh hian lei tur a awm hial mai.
Edu domain neih hi maktaduai tela sum kal ral tur khekna (safe-na) a nih avangin Sorkar Approved/Affiliated institute te tân chuan neih ve ngei hi tihmakmawh leh ṭul tak a ni. Quality education kan sawi fo va, zirtirtu ṭha an pawimawh rualin hmanraw tha kan mamawh em em bawk a, hemi lama kan sum leh theihna kan hlan (invest) hi a ṭul tak zet a, kan institution chawilarna leh khawvela kan dahchhuah ve theihna tukverh pawimawh tak a ni bawk.
If you're big headed, you can also use it to further inflate your ego.