Saturday, 2 April 2016

Stackoverflow hi ka inzirna hmun

Stackoverflow hi khawvela programmer zawhna leh chhanna community lian ber a ni a. An kalphung hi ho te a ni a. Mi tu pawhin awlsam tein a thlawnin an zawm thei a. Programming-a an harsatna te an zawt thei a, mi zawhna an chhang thei bawk a. Zawhna chu programming lam a nih ngei ngei a ngai a, code inziahsakna hmun a ni lo va, code dik lo leh bug in solve-sakna hmunpui a ni. Tam tak chuan mawl tak takin zawhna an zawt a, chutiang te chu zawtna zawt thei tawh lo tura block hmak hmak an ni bawk. Zawhna chhanna pawh sawifiahna tlem tal a tel loh chuan vote downa ni tlangpui thin. Zawhna tha leh chhanna tha chuan vote up an hlawh tlangpui bawk a ni.
Kan zawhna leh chhanna tang hian vote hmangin reputation point leh score te pek kan ni a, kan zawhna leh chhanna chu vote down a nih chuan kan point kan hloh ve zel thei bawk a ni. Kan reputation point bakah hian kan score atangin badge hrang hrang kan hlawh leh thei a. badge-ah rau rau pawh tag badge hlawhchhuah hi a awl ai lo hle a ni. Tag badge hi Bronze, Silver leh Gold-ah then hran a ni a, Bronze badge hlawh tur hian kan chhanna tag entirnan PHP-ah khan 100 tal kan score a ngai a ni. Hei hian a entir ber chu PHP language basic chu kan nal ve thawkhat tih a entir ber a ni. Silver badge kan hlawh chuan Intermediate level php Programmer vel kan ni tihna a ni leh ang a, Gold tag badge kan hlawh chuan PHP expert kan ni tihna a ni. Silver badge hlawh tur hian php tag-ah 400 tal score a ngai a, Gold badge hlawh tur hian 1000 tal kan score a ngai bawk a ni.
A chipchiar takin engkim ka sawi hman lo va (hetah hian lo bih la). Ka sawi duh ber zawk chu stackoverflow-ah hian kum 2 leh thla 9 member ka ni tawh a, eng eng emaw vangin ka active thei lo va, member ni reng chung siin member ni lo ang velin kum 2 chu ka hmang liam a, tun hnai thla hnih thum vel hian ka lu ve ta zeuh zeuh a. A bikin tun kar chho phei hi chuan ka awl tawh phawt chuan ka lut ve ta ziah a. He ta ka thil hmuhchhuah chuan nasa takin ka improve tih hi a ni. Zawhna chu ka zawt chiam lo va, mi zawhna ka chhang ber a. Member 4.7 million karah zawhna lo lut chhan inchuh chu a hau tak cher cher khawp mai. Kan chhanna an accept loh phei chuan eng reputation leh point mah kan hlawh chhuak (score) thei bawk si lo. Mahse hetiang zawng hian ka ngaihtuah a, pratice-na ni mai alawm. tiin. Mithiam pui pui kara chhanna lo pek ve chu a inthlahrunawm duh thin kher mai. Buaithlak leh bawk chu chhanna ka ziak tan ve dawn chauh a, mi pahnih pathumin an lo chhang hman zel thin hi a ni. Mahse tim hauh lovin inzir nan tiin ka chhang ve ta zel a. Tichuan hman ni khan unsung Hero (gold Bagde) ka hlawhchhuak ve ta a.

Stackoverflow hian dataquery an lo dah reng mai a: Chhanna ka pek atanga an lo accept dan average chu 34.% vel a ni. Stackoverflow-a points hmu sang ber leh ranking-a pakhatna ni mek Jonskeet chhanna acceptance % chu 60.42% a ni a. 60% pelh hi thil theih loh ang hialin sapho pawhin an sawi a ni.

Stackoverflow-a thil chhinchiahtlak tak mai an dah dang leh chu answer score graph hi a ni.
 Community pumpui kan chhanna that dan (effectiveness) lan tirtu ber chu average answer score hi a ni bawk a. Kei chuan ka la score chhe hle: Ka average score chu 1.05 tih vel chauh a la ni a, Jon Skeet ve thung chu 8.16 vel a ni, a san belh leh tawh mai thei bawk. He data hi a pawimawh hle, kan chhanna a that chuan kan score pawh a pung ve thin a. Miin kan zawhna an accept khan reputation chu point 15-in a pung ngei a, mahse score engmah kan nei lo va, mi dangin kan chhanna kha tha an tih a, an vote up chauh khan score kan nei a ni. Chuvangin Answer pakhat zela 1.05 vel score pawh hi hau tak tak chu a ni. Chhan uluk a ngai a nih ber chu.
A chunga ka sawi bak pawh hi data query atang khan zirchian zel theih a ni a. A pawimawh ber chu mi zawhna kan chhan khan kan hriatna kan tuaithar leh zel tihna a ni a. Chhang dik turin keimahni pawh kan inzir belh ve zel a ngai bawk a ni. Programming eng pawh i tui a nih chuan stackoverflow-a awm hi thil tihmakmawh a ni. Stackoverflow hian reputation 200 (reputation hi point 200 aia tam ni khatah hlawh theih a ni lo) chuang nei chin atangin ranking a siam a, tuna member 5,396,014 atanga ka ranking chu 53277 a ni a. Hmabak a la ko hle mai.

Eng language-ah pawh expert nih i duh chuan Gold Badge hlawhchhuah tum la, i hlawh chhuak thei ngat a nih chuan expert i tihna a ni ang. Reputation tih vel hi chu a hming mai a ni a,  1000 i score theih chuan nasa takin i problem solving skill pawh i improve ngei ang. Stackoverflow site kalphung hi a fel fai hle a, vote abuse vel pawh thiltheih loh a ni a. Entirnan account pathum pali pawh nei la, i ip address leh i voting kalphung hmangin mi pakhat angin i awm reng tho ang. A tir chuan ka awih chiah lo va, reputation abuse tumin account dang te kan hawng vel chhin a, vote ka han inpe sang sang a, a hnu rei lo teah chuan he message hi ka dawng nawlh mai a: This account is temporarily suspended for voting irregularities. The suspension period ends in 7 days. Fake vote chu an paih nghal vek bawk a ni.
My account is suspended due to fake votes
Hei vang hian ni 7 ral hma chu min zawhna pawh ka chhang thei tawh lova, midang zawhna ka chhan tawh, comment hmanga kan inhrilhfiah mek te, zawhna ka chhan theihna te, mi ka vote-up theihna te chu ni 7 chhung tan hman theih lohvin a awm ta hmiah mai a, ka reputation pawh 1-ah lock a ni bawk. Fake vote chu an man thiam khawp mai, khawl dang leh ip dang atang pawh ti mah ila an man nghal chat chat thei a ni. Mahse an fair ve leh na em em chu zawhna kan chhan atanga vote dik tak kan hmuh chu paih a ni dawn lo, tih moderator te'n chat atangin min hrilh a, ka experiment-na a ni a, ka fake reputation kha chu paih vek ula, a ngaiin min kaltir leh rawh u, ka tih pawhin a theih loh thu leh ni 7 hnuah chauh a ngaia ka kal theih tur thu min hrilh a, tun hnua hetiang thil a thleng leh a nih chuan i account pawh remove hial a ni ang tih thlengin min hrilh ta mai a ni. Stackoverflow fair zia chu a takin ka hmu ta a ni.