Backup pawimawhzia hi 2010 hnu lamah pawh a tam zawk chuan kan la hrethiam tawk kher lovang. Chutihrualin data pawimawhzia chu nitin kan hriatbelh zel thung a ni. Backup hi a Zotawng chuan dahthat/vawnthat tiin a sawi mai theih ang. Mihring kan changkang chho tulh tulh a, Digital device chi hrang hranga kan innghahna pawh a sang chho ve zel a. Heta pawimawh ber chu device-a kan data hrang hrang te hi an ni a, mahse heng data te hi hlohpalh, rukchhuah leh khawihchhiat awl tak vek an ni. A tlangpuiin kan data te chu Hard drive leh memory card-ah te kan vawngtha/dahtha thin a. Hard drive leh memory card te hi buai thei, chhe thei, ruk theih, tihbo theih, virus tihchhiat theih leh kang thei lo pakhat mah an awm lo.
Thil che chi reng reng hi kumkhaw daih a awm thei lo tiin an sawi thin a. Chutiang bawkin Hard drive te hi beisei lawk miah loh pawha chhe thut thei vek an ni. Hetia kan data vawnthatna ber hi rintlak tawpthang a nih tak si lovah chuan mi chengvawng deuh te chuan Hard Disk dang leh Memory Card, Disk, Pendrive dang dangah te kan data pawimawh tak tak te chu kan dahtha (backup) thin a. Computer-ah chuan a tlangpuiin C drive chu System drive kan ti a, Operating System a chhiatpalh a hlauhawm thin bawk avangin kan mimal data pawimawh dah nan Drive dang kan hmang thin a. Entirnan kan Computer Drive C,D,E te kan nei a, C Drive hi System Drive a nih angin System file ho awmna a ni a, D leh E, F te hi data hrang hrang..thlalak, video, mp3 leh software backup dah nan te kan hmang thin a ni. Mahse hei pawh hi a him tawk thin lo va, chuvangin hard Disk leh memory dangah te dahtha kan awm thin bawk a. Mizoram bikah chuan Pendrive hi kan hman rinrawl ber a ni. Tun dinhmunah chuan a tam zawk chuan Pendrive, Computer Hard Disk leh Memory Card vel bak data vawnthatna dang kan la melh lutuk lo ni pawhin a lang.
Thenkhat tan chuan kan data te hi an hlu hle a, chuvangin a him thei ang bera vawn that pawh tihmakmawhah kan ngai a ni. http://typesofbackup.com/-in a tarlan dan chuan Data dahthat(backup) dan hi chi hrang 11 vel a awm a. Chipchiar takin kan sawi hman dawn lo va, hriatchian duh chuan a site-ah hian luh mai tur. Backup kan hman atan tha http://typesofbackup.com/ kan chhiar atanga lang te tlem han tarlang ila.
Off-site Backup: Data a awmna pangai ni lo, hmun danga kan dahthat hian Off-site backups a awm huam ber a. Hei hi data bo laka invenna tha tak chu a ni meuh mai, Mahse building khatah vek kan data chu an awm si chuan kangmei leh khuarel chhiatna dang lakah erawh an him hauh chuang lo. Chuvangin hmun dang, khaw danga dahthat a kawk ber a ni.
Online Backups or Cloud Backup: Online backup hi tunlaia backup hmanlar ber pawl a ni tawh a. Mahse, hman fimkhur a ngai ve hle thung a. Data paihsual(delete by mistake) leh replace(thlak sual) a awl thin hle a. Kan data-a kan khawih vel dan history zawng zawng a lan theih loh tlangpui bawk avangin Undo(tihthat/siamthat) theih a ni lo bawk.
Offline Backup: A tir lama kan sawi ang khan hei hi data vawn that nana kan hman nasat ber pawl a ni a. Data kan hman lohna drive-a dahthat a kawk ber a. Entirnan Pagemaker chu C drive-ah kan install-a D drive-ah zip-in a backup kan dahtha thin a. Hei hian Virus, malware leh ransomeware lakah kan backup chu a lo vawnghim ve thin a ni. Chutihrualin kan system a buai tak tak chuan kan backup hi a him bik chuang lo a ni. Offline backup hian Pendrive, CD, DVD leh memory card-a vawn that te pawh a huam tel vek a. An him lohna ber chu Virus khawihbuai theih an ni vek leh tihbo leh tihchhiat palh theih vek an ni hi a ni.
Backup dan tha leh him ber: Data vawnthat nan hian engmah hi him tawk a awm thei tak tak lo va, chutihrualin tha leh rintlak bik erawh a awm ve bawk. Mizo te pawhin kan intihhmuh tan Cloud Backup solution hi rintlak chho ber tura ngaih a ni. A bikin Commercial Cloud backup solution te hi eng emaw thut lakah pawh lukhawng nei deuh an nih avangin a tha ber tia sawi theih an ni bawk ang. Cloud backup solution te hi computer leh smartphone te nena awlsam taka thlunzawm vek theih an ni a, man chawi ngai (Commercial) solution, PC Magazine review lang te chu:
1. IDrive - 1TB $59.50 per year
2. CrashPlan - Unlimited $59.99 per year
3. SOS Online Backup - unlimited $79.99 per year
4. Carbonite - unlimited $59.99 per year
5. SpiderOak - 1TB $129 per year
6. BackBlaze - Unlimited $50 per year
Man chawi ngai(Commercial) kher lo, a thlawna hman theih te pawh an awm ta fur a, chung zinga lar zual deuh te chu:
1. Google Drive - 15 GB
2. Microsoft One Drive - 15 GB
3. Apple iCloud - 5 GB
4. iDrive - 4GB
5. SpiderOak - 2GB
7. NerobackitUp - 5GB
8. OpenDrive - 5GB
te hi an ni a. Free storage dang lar zual te chu:
1. Drop Box - 3 GB
2. Box - 10GB
te hi an ni. Kan sawi tawh ang khan heng cloud backup solution tam zawk hi chuan kan file history an chhui vek lem loh avangin fimkhur taka hman a pawimawh a ni. Online storage that lohna dang leh nia lang chu Internet Connection tha a mamawh hi a ni.
No comments :
Post a Comment