Monday 5 March 2018

Online-in GAS ka order ve a

Facebook lama Pu Lalhriata chawngthu te sawi ka hriatna tang leh keima taihmakna chhe te telin Ni 13th February 2018 khan Online-in Gas ka book ve a. Ka book ni hian intithei takin ka wall-ah te ka post ve nghe nghe a ni. Hetianga mahni inchhung lum atanga Gas book theih leh kan ina min rawn deliver thlap thei a ni, tih hi hre lo kan awm nual ka rin vangin leh buaina awm thei leh ka buai mekna te rawn tarlan ve zuai hi thain ka hria a ni.
 
Ka book zawh hlim hian online-in Gas ka book thu te, ni 3-4 chhungin min rawn deliver nghal tur thu te ka dawng a, kan intithei ang reng. Intlar buai ngai hauh lo va, an rawn deliver thlen hun chu ka nghakhlel khawp mai.
 
Mahse, hun rei tak atanga kan lo tum tawh, chhungte thlan en turin kan zin a ngai thut mai a, chuvangin a tuk 14th February 2018 chuan thingtlang lam hla tak, Airtel Signal thlen phak lohna, Pu Hawla kawngtha sawi rulnga pa ang zar hmuh tur vanna em em hmun pan chuan kan chhuah a ngai ta si a. Tichuan 14th February khua a lo var chuan, long run tur kan nih avangin ka bike pawh uluk mangkhengin kan check a, engine oil te, chain lube te leh front tyre te ka thlak vek a. Serchhip kan thlen hian Road Safety duty vangin kan ding khaw tlai deuh hlek a, ka facebook-wall-ah pawh serchhip kan thlen thu te hi ka post vel a ni.
 
Zin chungchang chu sawi thui tawh lo mai ila. Aizawl ka lo thlen thlak leh hi chuan 19th February 2018 a ni tawh. Ka chauh deuh vangin Gas lam pawh kha ka ngaihtuah vak lo va. Ka hna vangin ka buai deuh char char a, Gas lam reng reng ka ngaihtuah lo. Tichuan 23 a lo nih chuan kan nu chu Gas chungchang ka zawt a, engmah a lo thleng lo, a ti a. Site-ah ka lut nghal chat a. ka order status vel chu kan check ta a, ka zinchhuah ni khan order a lo awm tlat mai chu mak ka ti a, Delivery status kan en leh chuan Order pahnih te chu Cash memo in ang chiah chiahin Delivered a lo inti bawk a. A dik lo reng reng tiin complaint ka siam ta a. Ni 24-26 chhung khan engmah dang chanchin ka hre zui vak lo va. Ka complaint status 27th February 2018-a kan en chuan a hnuaia thu hi a lo inziak a: Distributor has resolved the issue. We tried to contact your contact number however, we received response that the number does not exist. Ka phone number hman hi Aircel a ni a, ka hman rinrawl ber a ni a, mahse min be tlang thei lo tlat mai chu a mak ka ti khawp a, complaint dang siam leh a ngai a nih hi, tiin Complaint dang ka Airtel no hmangin ka siam leh a ni. Tichuan Distributor lam atangin phone call ka dawng a, mouse click sual vangin ka order chu delivered a lo ni, tih thu min hrilh a. Tin Mizoramah hi chuan online order hi Gas semchhuah hunah chauh lak theih a nih thu leh door to door-a delivery chu Mizoram Nodal Officer-in a remtihloh avangin kan ti ngai lo, a ti bawk a. Kan inbiakna hi a pawimawh dawn ema ka hriat vang leh complaint thehluttu ka nih avang tein Court lamah te kal a ngaih takin tiin kan inbiakna chu ka record vek nghe nghe a. Min hrilhfiah ve nasa a, mahse ka order history-a delivery status an thlak thei tlat lo mai hi ka ngai thiam thei lo hle a. Kan inbiak zawh a, ka complaint status ka check chuan ‘Resolved’ tih ringawt hi a lo awm leh bawk a. Ka buaina engmah chinfel loh a la nih miau avangin ka reopen a, Indane hotu te lam atangin min ron phone a. Ka order ni miah loh order a awm thu te, ka order sa pawh ni 10 liam hnuah pawh deliver a nih loh thu te ka thiam ang tawkin English chuan ka hrilh ve a. Buaina ka tawh vang chuan phungthlu takin thupha te pawh a chawi ve nasa a. Kan chinfel sak vat ang che, tiin min tiam thlap a ni.
 
A tuk Nilai 28.02.2018 chuan Distributor lam atangin Phone call a ron ri leh a, Gas kan vengah an sem tur thu leh kan point ni lo mah se, ka order chu min ron deliver tur thu min ron hrilh leh a. Ka lawm viau mai. Online-a Gas order thleng hmasa ber emaw hmasa pawl chu ka ni mai lo’ng maw te ka ti hial a. Kan veng VCP hnen atangin phone call a ron ri leh a, Ka Gas tur min ron pek tur thu leh online vela ka order thei vel chu min ron fak luam a, “Hetianga hmalatu in awm hi a lawmawm” ti tein min ron fakder (fak tlak em em ka nihna ka hre lem lo) ve nghe nghe a, a ruk tak chuan min tilawm viau. Kan thenawmah mitthi an awm vangin ka chhuak lo va. Gas phurtute chuan min ron phone leh ta a, tichuan Gas chu ka dawng ve ta, ka va lawm em.
 
Nimin March 4, 2018 thleng khan ka indane account-ah pawh chuan ka lut ta lem lo va. Mahse vawiin hian Distributor lam atangin ka FB wall post siamtha tura ngenna ka dawn avangin ka indane account-ah chuan ka lut leh ta a. A chung lama English-a an resolve-na ziak khi a ngial a nganin ka letling lo va, ka wall postah khan ka “Distributor lamin ka phone number hi number awm lo angin an lo dah a”. tih lai hi an ngaih sorry em avangin min be tlang thei lo va, tiin ka edit tha a ni. Mahse, a nihna takah chuan engmah resolve si lo va, a hnu-a kan inbiak vang ringawt a, resolved tih ringawta an lo dah kha chu, a ngaihsamthlak ka la ti tho. 
 
Vawiin March 5, 2018 hian ka my indane account-ah chuan ka lut leh a, a hnuaia a lema kan hmuh ang hian ka order history chu a lo awm a.
My Order History
Subsidy engmah a la in update lo va, Gas refill man atan hian Rs 870 ka seng a. Indane site atanga a lan dan chuan Gas bur khat refill man hi Subsidy te nen telin 817 vel a ni a, chuvangin an semnna delivery charge vel vangin Rs 870 a nih dawn hi ka ti mai a. Mahse a lan dan hi chuan ka order ni miah lo min rawn deliver a, ka order ni ngei si delivered tawh anga inziak hi engmah Gas ka dawng chuang si lo. Chuvangin thil felhlel hi tihchian a ngai a ni tiin a hnuaia mi ang hian complaint ka siam leh tawp a ni.

Cash Memo No. 3000095897 is not delivered to me. In fact, I did not create any order on 14th February 2018 because I was on travel. I ordered on 13th February, 2018. Cash Memo No.3000098216 was delivered to me last week. I had only ordered one cylinder. The distributor delivered the one I had not ordered, and that means my real order is still undelivered. As the distributor already delivered Cash Memo 3000098216, you cancel Cash Memo No. 3000095897. Thanks
Kan Distributor te hi kan hriatchian a ngai hle tih online order vang hian ka hmuhchhuah belh nual a, Distributor te hi Public-a audit theihna te Indane hian a nei vek a, a audit duh tan chuan a hnuaia link-ah hian luh tur: https://spandan.indianoil.co.in/transparency/distributer-search.php Sawi tawh thin angin Distributor Delivery Performance Mizoram-ah chuan Excellent vek a ni a, chu chu a hnuaia thlalak atang hian i hmuh theih bakah a chunga Audit-na link atang pawh khian i hmu thei ang.
Distributor Performance Rating
Mahse Gas hi Online booking ngat phei chuan kan hmu har hle a nih hi. Public-a audit theih an nih tho avangin a hnuaia Consumer hming in ang rapthlak nasa lutuk te hi mak chu ka ti deuh thin. Zothansangi leh Zothansanga hi Distributor pakhat lek hnuaiah hian kan va tam em?
Zothansangi
Zothansanga
Mizoram-a Gas Refill Rate chu Indane site a tarlan dan chuan a hnuaia ka sawi ang hian en theih a ni. https://indane.co.in/tarrifs_price.php?start=411&fdate=&tdate=&alpha=&search=&txtMarket=&txtProduct= Note: 411 kan ziakna hi en la, 415 thleng hian Mizoram a huam a. I web browserah khan Link hi hawng la, i en thei chu a ni mai.

No comments :

Post a Comment